geguritan

LALI JANJI

Dening : M. Ahmad Jalidu

Dadi kowe wingi lali?

Dadi wingi kowe mikir liya?

Ya….

Pancen lumrah

Kowe manungsa, isih bisa lena

Kowe dudu nabi, dadi lumrah yen lola lali

Nyata aku uga manungsa

Getihku butheg kaya getihmu

Mripatku teles kaya duwekmu

Nanging kena apa aku ora lali

Wingi bengi, ing pretelon kae nganti jam-jaman

Aku panggah lungguh nggresah

Ngenteni kowe nyunggi janji

Dina iki aku tetep ora lali

Ora lali, lan ora bakal lali

Wingi bengi, kowe blenjani janji

geguritan

BIYUNG

Dening : Budiono Dayak

Tan bisa kinira dawaning dalan uripku

Tan bisa kaetung luh kan tumetes saka netramu

Ing saben dina kang lumaku

Biyung….

Donga kang rinengga saben tengah wengi

Endah… kadya abyoring lintang

Kok sebut jenengku ing saben ukara pujimu

Kadya angin pesisir sumilir ing tyasku

Biyung…

Sastra atur pangabekti tan bisa

Weh lelintu mring asih

Kang wis kaukir saka jiwa ragaku